ديل الكلب عمره ما يتعدل

ديل الكلب عمره مايتعدل !

المثل بيقول “ديل الكلب عمره ما يتعدل“، طب فكرت قبل كدا أصلًا إيه أهمية ديل الكلب؟ 🐕

الحقيقة إنه مهم جدًا لأنه بيستخدمه في:

1- الحركة:

ديل الكلب له دور كبير في حركته خاصة وقت الجري أو المشي السريع، نفس فكرة حركة ايدينا وقت الجري.. جرب تكتف ايديك واجري! الأمر صعب جدًا وكذلك ديل الكلب من غيره هيبقى متكتف. 🤷

2ـ الإتزان:

الكلب لما يمشي في مكان ضيق بيبقى محتاج يكتسب توازن، وهنا يجي دور ديله بأنه يديله توازن يعرف يعدي بيه الجزء دا، نفس فكرة لو أنت ماشي على طريق رفيع وقتها بتحاول تكسب توازن بحركة ايديك وإلا هتفقد توازنك، دا نفس دور ديل الكلب.

3- التواصل:

لو عايز تفهم كلبك صح، لازم تركز مع حركة ديله؛ لأن كل حركة ليها معنى وكل شعور هو عايز يعبر عنه بيعبر عنه بديله.

“وَمَا مِنْ دَابَّةٍ فِي الْأَرْضِ وَلَا طَائِرٍ يَطِيرُ بِجَنَاحَيْهِ إِلَّا أُمَمٌ أَمْثَالُكُمْ مَا فَرَّطْنَا فِي الْكِتَابِ مِنْ شَيْءٍ ثُمَّ إِلَى رَبِّهِمْ يُحْشَرُونَ”.